Webs de C21

Vamos manter este blogue (histórico) de C21 en Tui, non obstante a información actualizada poderás encontrala nas seguintes páxinas de internet:


Blog de C21 Tui: https://converxencia21tui.blogspot.com/p/historia-c21-tui.html
Web de Converxencia 21: http://converxencia.eu/
Web de Carlos Vázquez Padín: https://carlosvpadin.gal/
Blog de José Manuel Palacín: https://discusionesbizantinaspalacin.blogspot.com/

Novo Blog do alcalde

Estamos de estrea, visita o novo blogue de Carlos en https://carlosvpadin.gal

Goberno alternativo?

Tratar de constituir un novo goberno é legal, pero tamén e lexitimo e perfeitamente xustificable.

É legal. De feito hai unha reforma legal de 2011 na que os concelleiros transfugas non contan á hora de contabilizar os apoios que precisa un goberno alternativo investido através dunha moción de censura, e aproveito para dicir, que aquí non hai nengún transfuga.

É absolutamente lexítimo que tratemos de constituir un goberno alternativo, e probablemente, de producirse, é o formato mais limpo da historia política galega, e isto é así por varias razóns.

Por coherencia ideolóxica: porque tres dos partidos da oposición son conservadores, e liberal outro, C21. Todo o mundo sabe que os partidos liberais e conservadores poden pactar e soen pactar. Nos dixémolo ducias de veces, fomos e somos críticos co periodo 1991-2015 e continuámolo sendo, diciamos que en Tui non era posible polas persoas, se hai recambio nas persoas remóvese o obstáculo principal.   Durante a campaña fomos moi claros, ninguén nos pode reprochar ter conseguido votos prometendo unha cousa e facendo outra. Ninguén. Tamén é verdade que é imposible actuar a gusto dos 1195 votantes que tivemos, algúns enfadaronse connosco en 2015, por apoiar un goberno de esquerdas, outros enfadaranse agora, obviamente non nos alegra, é o que ten a democracia representativa, C21 quere apostar pola democracia directa nalgúns asuntos, como os orzamentos participativos. 

Por transparencia total, calquera actuación deste teor soe ser tremendamente oscurantista, non desde logo neste caso. dixemos públicamente que estábamos dispostos ao pacto e puxemos condicións ao mesmo, tanto de renovación de persoas como de liña programática e ambas cousas foron feitas públicas cunha nota de prensa a primeira en xaneiro e cunha roda de prensa o 1 de xullo a segunda, o alcalde sabiao desde outubro de 2016 como recoñeceu en prensa e non moveu un dedo para abrir un diálogo que contribuise a evitalo. 

Lexitimidade democrática absoluta: os partidos que estamos na oposición obtivemos máis votos e máis concelleiros que os que están no goberno. É mais, non ten uns principios democráticos moi firmes quen cre que están mais lexitimados para gobernar 8 concelleiros que 9. Lembremos ademais que o señor Cabaleiro é alcalde sen ser candidato da forza máis votada e que o PSOE acaba de presentar unha moción de censura na que obterían a alcaldía en Valdemoro, localidade na que foron cuarta forza. Por certo, estase esquecendo interesadamente que C21 foi a terceira forza máis votada en Tui, desde as elección ninguén se preocupou en lembralo, somos diferentes, somos innovadores e portanto incómodos para os inmobilistas.

Deixamos un tempo máis que prudencial para coñecer como funcionaba o goberno, é obvio que en dous anos non se poden resolver todos os  problemas de Tui pero tamén puidemos ver atitude, a capacidade de xestión e os resultados. Plantexar un goberno alternativo uns meses despois de ter investido a outro tampouco sería correcto, non da tempo a avaliar ao goberno, obviamente non é o caso, acabamos de pasar o ecuador do mandato.  

Un hipotético novo goberno é totalmente xustificable, lembremos que apoiamos a Enrique Cabaleiro na investidura cumprindo a nosa promesa eleitoral de que nunca fariamos alcalde a Rocha nen por activa nen por pasiva. Podiamos ter tentado conseguir a alcaldía nese momento e non o fixemos, obviamente isto destroza moitos relatos interesados, eu podería moi probablemente ter sido elexido alcalde no 2015 ou cando menos xogar as miñas bazas nese sentido e non o fixen. 

Fixemos o correcto, cumprir a nosa promesa eleitoral de apoiar ao candidato alternativo a Rocha e non entrar no goberno, pero todos sabemos que o cumprimento dos programas brilla pola sua ausencia na política española. En política moi pouca xente cumpre o programa cando vai en detrimento das suas opcións de tocar poder, vimos despois con certa sorpresa que o alcalde e o goberno non nos agradeceron en absoluto o apoio, e iso resultou ser o preludio da atitude que vimos no goberno nestes dous anos, desde o inicio C21 tendeu a man ao goberno e ofrecemonos como socio estable exterior ao goberno, a nosa proposta non foi aceptada, en seguida vimos a estratexia, a C21 nen auga. Non só evitaron o diálogo connosco senón que a nivel de formas non se comportaron correctamente.

En todo o que levamos de mandato non se aceptou unha soa proposta de C21, nen a supresión ou rebaixa do imposto da plusvalía de cara aos orzamentos do 2016, nen pequenas cousas simbólicas como as consultas por internet ou o reloxo antidebeda, cuestións de importancia menor pero que puxeron de manifesto que había unha consigna clara de evitar calquera influencia nosa no concello. Tremenda torpeza política a de golpear a quen renunciando a posibilidades propias te facilitou o aceso ao goberno. 

Fixemos en todo momento unha oposición construtiva e fomos pagados con desplantes e incluso con acusacións de xenofobia. En definitiva non somos masocas nen martires e temos o compromiso cos nosos votantes de tratar de aplicar o noso programa na medida que poidamos, con este goberno quedou claro que a capacidade de influencia era cero, cun goberno en minoría!!.

Tamén é xustificable, por moito que agora fagan fotos os oito membros do goberno xuntos nunha manobra propagandistica, o goberno actuou como catro compartimentos estancos durante todo o mandato, e a proba é que o único proxecto relevante que lanzou este goberno é a abertura da rua Ourense, o BNG implementou a peonalización que lle deixou praticamente todo feito o anterior goberno do PP: a ordenanza, os bolardos automáticos, etc, e vai sair en pouco tempo o PEPCH que tamén deixou o anterior goberno do PP moi avanzado, é dicir, proxectos propios a abertura da rua Ourense e sendo moi xenerosos (como sempre fomos), xa que non está ainda aberta, non houbo estratexia común de nengún tipo nen acordo programático previo á constitución do goberno. Puxeron o carro diante dos bois, non significa que fixeran todo mal, pero o balance de xestión é mediocre.

E finalmente, un goberno que constituisemos os nove concelleiros da oposición sería moito máis novo en idade que o actual goberno, estaría composto por unha inmensa maioría de concelleiros que entraron por primeira vez no concello en 2015 e en 2017, supondo un relevo xeneracional profundo e definitivo no concello do que non pode presumir o goberno actual e sobre todo a presenza de C21 nun papel relevante garante que o cambio é real e non o digo eu senón que o di o nervosismo dalgúns que saben que C21 é unha organización xenuinamente progresista, con capacidade de xestión, con probado amor a Tui e con visión estratéxica, se acreditasen de verdade que o que se propón é unha volta ao pasado, ou unha manobra lampedusiana, de cambiar para que todo siga igual, estarían moito máis tranquilos, darian por feito o apoio masivo nas eleccións do 2019 pero teñen serias dúbidas de que o goberno que os pode sustituir non fose máis eficaz, participativo e transparente e desde logo moitísimo mais cohesionado e coordenado que o deles, dai probablemente a histeria dalgúns. 

Fago un chamamento á calma, a catedral seguirá no mesmo sitio, tanto se segue este goberno como se non deberiase aceptar como un acto de plena normalidade democrática, é comprensible que os nosos adversarios nos critiquen, forma parte consustancial do xogo político, pero non que nos difamen utilizando calquera cousa, como mentiras para espallar dúbidas sobre o meu compromiso co esclarecimento no acidente de Angrois ou gravísimas instigacións ao transfuguismo ao meu compañeiro Eduardo ou que se dediquen exclusivamente a facer ataques persoais sen argumentos á miña persoa, non vamos tolerar un linchamento antidemocrático, esperemos que, pase o que pase, todo se desenvolva con tranquilidade e con contraste de argumentos a favor ou en contra do goberno ou a favor ou en contra da proposta alternativa. No que de min dependa, se paso a estar no goberno, podo asegurar que este será moito máis dialogante que o actual pese a que contaría con maioría absoluta, a diferenza do actual.

En suma, governo alternativo? Depende dun acordo programático público previo ao que non se chegou ainda. 

Posicionamento de C21 Tui a respeito das demisións anunciadas no pleno de maio

Por parte de C21 correspondenos respeitar os procesos persoais e políticos que levaron a presentar a anunciar as suas demisións no pleno de onte 25 de maio a Antonio Fernández Rocha, Manuel González e José Manuel Sousa, voceiros municipais respectivamente de PP, CTs e APG. Todo o protagonismo nas causas e motivos desa decisión correspondelle, como non podería ser doutra maneira, a quen a tomou.

C21 non vai interferir, nen comentar de ningunha maneira os procesos internos das demais formacións políticas, igual que pedimos respeito á independencia política e organizativa de Converxencia 21, entendemos que os demais tamén o merecen. 

Ao igual que sempre o estivemos, continuamos abertos a un diálogo de carácter programático coas forzas políticas que, xunto a C21, configuran a oposición no concello de Tui. 

Que faria o novo goberno?

C21 ven de propor ao Partido Popular e aos partidos da sua órbita un pacto para configurar un novo goberno, non sei se vai producir ou non, pero coido que os tudenses merecen saber que é o que faría ese novo goberno, ou cando menos que é o que proporía C21 que debería facer ese novo goberno.

En primeiro lugar darlle un forte impulso á participación cidadá que está na actualidade en estándares peores que os do anterior alcalde, nos proporiamos a instaturación da figura do 18 concelleiro, é dicir, se unha persoa física ou xurídica reúne un número determinado de asinaturas puidese presentar e defender esa proposta ante o pleno, tamén defendemos a implantación de orzamentos participativos nas parroquias, cada parroquia, dentro dos recursos disponíbeis, fixaría democráticamente as suas prioridades de investimento. Por suposto, dentro dun limite razoable e do debido respeito o público podería facer cantas preguntas considerase oportunas nos “Rogos e preguntas” do público, cousa que agora non pode facer.

Desde a perspectiva fiscal C21 suprimiría o imposto da plusvalía e fortes bonificacións do ICIO, especialmente no casco vello, tamén hai moito campo de mellora na eficiencia da recollida do lixo, hai moito percorrido para apostar pola reciclaxe e a compostaxe reducindo a factura de SOGAMA e obtendo uns ingresos pola venda do material reciclable. As baixadas de impostos atraen actividade e a actividade acaba producindo a medio prazo aumentos de recadación, non vamos prosperar convertindo Tui no inferno fiscal ao que aspira a esquerda. 

Convertiriamos a Tui nun concello business friendly, é dicir, amigable para os negocios, para atraer capital privado e poboación, algo imprescindible para relanzar a decaidísima actividade económica. E non facéndolle favores a ninguén, simplemente baixando impostos e mellorando a axilidade coa que o departamento de urbanismo tramita as licenzas. Tamén impulsaríamos a seguranza xurídica, os empresarios e autónomos teñen que ter seguridade xurídica para investir con confianza. 

En relación ao uso do remanente de tesouraria proporiamos a abertura completa da rua Ourense, cara o sur (xa en marcha) como cara o norte, cara a Avenida da Concordia, tamén habería que relanzar o proxecto de paseo natural á beira do rio desde Caldelas a Areas, compraríamos a faixa de terreo necesaria para ampliar o nº1 e poriamos eses terreos a dispor da Xunta para a ampliación do Colexio. Executar o PXOM no que se refire á Area Panorámica convertindoa en zona verde e de lecer e para compensar a perda de prazas de aparcamento, habería que convertir as zonas de aparcamento en liña en aparcamento en espiga e as direccións únicas que permitise xerar a abertura da rua Ourense implantar tamén aparcamento en batería ou espiga (idea xa esbozada polo actual goberno). Unha parte do remanente ficaria sen gastar, para ir acometendo proxectos nos vindeiros anos, mentres anos se poderia investir, se hai encaixe legal, que coido que o hai, en bonos do tesouro. 

O casco vello é moi importante, o futuro de Tui como polo de atracción turística, ainda que non é doado hai que ver formulas que permitan restaurar o Teatro Principal e en relación ás casas que están con expedientes de derribo en marcha, máis de 10, se os propietarios se desentenden delas, subastalas a baixo prezo para particulares dispostos a rehabilitalas, tratar de implicar ao Instituto da Vivenda e o Solo na rehabilitación das que non se puideran vender a particulares. É moi importante tamén o soterrado do cableado e aproveitar para meter fibra óptica e gas por todas as ruas, o Plan Director do Consorcio teno previsto, compre tamén virar dun modelo de lecer nocturno a un de lecer diurno orientado ao turismo e aos tudenses. Continuariamos co proxecto de peonalización actual, coa perpectiva de ilo aumentando, seguiríamos tamén a tramitación que está a levar o BNG do novo PECH, non é perfecto pero non podemos seguir esperando, levamos neste asunto 20 anos de retraso, como en moitas outras. 

Compre tomarse a Eurocidade en serio, un proxecto de carril bici que unise Tui e Valença sería un proxecto que reforzaría a integración entre Tui e Valença, primeiro hai que dotar a entidade de personalidade xurídica propia. En relación á cuestión industrial habería que por toda a carne no asador para conseguir dunha vez a execución do acceso do Polígono de Areas á VAC. 

Desde logo non sería un goberno continuista nen regresivo, senón máis progresista que o actual, máis innovador e moito pero que moito máis reformista. Estou convencido que é o proxecto que Tui precisa para gañar o futuro. 

Profunda decepción

Cando o ano 2016 toca ao seu fin e tras ano e medio de exercicio do poder polo novo goberno municipal xa podemos facer valoracións sen temor a estar xulgando sen información, ainda que sempre dentro da subxectividade humana, salvo Yolanda Rodríguez, ninguén está na posesión da verdade absoluta. A decepción que sentimos en C21 a respeito do novo goberno, o mesmo cuxo alcalde nós apoiamos incondicionalmente na investidura é profunda e fácilmente argumentable. 

Pero queremos comezar deixando claro e afirmando algo que todo o mundo puido comprobar nos plenos do que levamos de mandato, a oposición en xeral, e C21 en particular, foi tremendamente moderada, construtiva e responsable, como o alcalde recoñece en privado, se a este factor lle sumamos que o goberno está en minoría, ao contar con 8 concelleiros, frente a 9 da oposición, as condicións estaban servidas para que o goberno estivese especialmente agradecido e tivese un comportamento especialmente fino e receptivo coa oposición en xeral e moi especialmente con quen o apoiamos na investidura, renunciando naquela altura a calquera intento por maximizar as nosas posibilidades de obter cotas moi importantes de poder.

Unha cousa é ser construtivo e outra colarlle ao goberno os dous supositorios que nos quixeron meter no pleno de decembro, un aumento de gasto en limpeza de 112.000 a 227.000 ou unha ordenanza acústica, incomprensible e que contempla no seu réxime sancionador, multas de até 300.000 €. Obviamente somos ferreños defensores do dereito ao descanso dentro da propiedade de cada un e entendemos que o concello ten que licitar o servizo de limpeza, pero se van pola vía unilateral e en contra do noso criterio e queren duplicar gasto ou derivar cara unha hiperregulación totalitaria obviamente non van contar co apoio de C21. É penosa a falta absoluta de talante negociador do goberno local, compre advertirlles que non pretendemos ser os parvos uteis de ninguén. A nota de prensa emitida polo concello despois do pleno non demostra ánimo rectificatorio algún. 

Encontrámonos ademáis cun goberno que non está á altura nen no fondo nen nas formas, é verdade que o goberno non é un todo, hai atitudes mais receptivas, pero desde o partido que lidera o goberno e ocupa praticamente todo o núcleo de poder municipal (alcaldía, urbanismo, facenda, persoal, tráfico, obras, etc), é dicir, o PSOE e desde o da agrupación máis pequena do goberno, Son de Tui, só nos temos encontrado con prepotencia e ataques, incrible pero certo, atacar a unha formación, como C21, que os apoiou na investidura e que está a facer un labor no concello construtivo e responsable, pero tampouco somos masoquistas. 

No que se refire ás formas estamos ante un paso atrás con respecto ao anterior alcalde, que mantivo sempre as formas ante unha oposición moito máis dura que a actual e que foi moi flexible nas intervencións do público nos rogos e preguntas, tendo en conta que contaba con maioria absoluta e podería terse permitido maiores restriccións neste sentido. O Enrique Cabaleiro pausado da oposición virou nun alcalde con frecuentes tics autoritarios e que non dubidou en realizar ataques persoais, ao noso voceiro chegoulle a dicir que era éticamente o pior dos 17 membros da corporación, en varias ocasións cortou ás persoas do público de forma claramente prematura e incluso nalgunha cuestión non lles respostou á pregunta ou rogo formulado. O señor Capón intervén en case todos os puntos o que deixa nunha situación de indefensión aos voceiros da oposición que xa esgotaron as suas quendas, de agora en diante vamos ter que exixir outra quenda para respostar ao señor Capón.

O concelleiro de Son de Tui chegou a chamar xenófobo ao noso voceiro por levar unha proposta precisamente para que as fronteiras europeas seguisen abertas. Toda a responsabilidade demostrada por C21 foi pagada con ataques mesmo de índole persoal totalmente inxustificados, se este é o comportamento dun goberno en minoría e fraco pola sua propia configuración multipartita como sería un goberno de un ou de dous partidos integrado por exemplo polo PSOE e polas Mareas de Podemos que contase con maioría absoluta?. 

Desde o inicio do mandato transmitimos ao alcalde que como partido liberal tiñamos moitas dificultades para nos integrar nun goberno de esquerdas pero que estábamos dispostos a ser o socio externo que o goberno precisaba para sacar os asuntos importantes adiante, entre eles, os orzamentos, tentamos negociar con eles os orzamentos do 2016, só lles pedíamos para votar favorablemente a implementación dun punto do noso programa eleitoral, a supresión do imposto da plusvalía que representaba unha restricción orzamentaria de menos dun 1%, non aceptaron.

Mesmo nun momento determinado, a principios de 2016 chegamos a ofrecernos a integrarnos no goberno, pero claro, non nun papel de comparsas, senón cun reparto de poder correspondente a termos sido a terceira forza máis votada, lembremos que o PSOE ten a alcaldia grazas ao noso voto e foi a segunda forza nas eleccións, e a non ter nengún interese en inmolarnos no altar do poder socialista, un papel que nos permitise influir de veras, pedimos ocupar a alcaldía o último ano e medio de mandato, escaso premio para quen poderia ter tentado ocupala os catro anos,  foi un erro ofrecerse, o segundo e derradeiro erro de inxenuidade, pensando que o PSOE estaría disposto a actuar coa mesma boa fé que nos actuamos. 

O dos orzamentos é o caso máis claro, pero a consigna foi sempre a mesma, a C21 nen auga, e nos temos o dereito a nos preguntar, nen auga ao grupo que renunciando a outras saidas te apoia na investidura sen condicións?, o desagradecemento e a falta de visión política teñen en Tui o nome de PSOE e de Son de Tui.  Sairon adiante propostas nosas co apoio do resto da oposición, pero o alcalde non as implementou coa excusa de que non eran competencia plenaria, eran propostas que custaba moi pouco implementar, a colocación dun cronómetro que marcase o tempo desde que o concello quedou sen débeda e as consultas populares con carácter potestativo e non vinculante a través da web. Onde quedou o famoso talante zapateril? No que levamos de mandato non houbo nen un só xesto político en positivo. 

En relación ao balance de xestión o listón deixado neste terreno estaba baixo, e probablemente en liñas xerais estemos ante un goberno que mellorou lixeiramente na xestión global, ainda que non en áreas como facenda e deportes, o urbanismo segue dando problemas, pero funciona lixeiramente mellor que no anterior mandato, parece que vai adiante a abertura da rua Ourense co apoio responsable da oposición, algo longo tempo agardado, facenda segue nunha liña continuista, con reparos case idénticos do interventor aos que facía no anterior mandato, enxérgase a orientación socialista, cando poidan encontrarémonos cun forte aumento de gasto público, de persoal no concello, de subvencións clientelares e por suposto un forte aumento de impostos para financiar o anterior, C21 evitou, en colaboración co resto da oposición, a suba do IBI.

Deportes funciona francamente mal, o concelleiro do ramo está actuando con nepotismo, improvisación, malgasto, desorganización, razoable a xestión en Cultura ainda que vemos unha forte propensión ao gasto, parecenos excesivo os máis de 80.000 euros gastados en San Telmo, co PP gastábase menos de 20.000. Tráfico toma unhas decisións incomprensibles ás que non se lles ve beneficio algún, como o acontecido en Riomuiños, e despois mostra unha teimosía moi difícil de explicar. O novo capataz de obras, colocado polo alcalde por libre designación, desautoriza ao concelleiro de Medio Rural. Os concelleiros do BNG son dialogantes e actúan de boa fé ainda que non sempre atinan e van lentos na implementación de reformas, un acerto deles a nova sinalización do casco histórico, os feitos da xestión ainda se fan agardar, están maniatados e maltratados por quen controla o goberno, e parece que se someten sen chistar, a sempiterna fidelidade canina do BNG ao PSOE. 

O goberno parece estar moi fracturado en dous bandos, cando ainda non chegamos nen á metade do mandato, e iso comeza a reflectirse na parálise dalgúns asuntos de gran importancia, a maior parte dos plenos están vacios de contido e non acaba de tramitarse o gran asunto do mandato e probablemente da década, os proxectos a financiar co remanente de tesouraría. Francamente o desempeño deste goberno é claramente mellorable e cando acaba o ano non hai perspectiva algunha de que vaiamos a ter orzamento para o 2017. O alcalde non está demostrando posuir o empuxe nen a lideranza que Tui precisa para sair do seu declive. 

Así as cousas é obvio que C21 non ten ningún motivo, nen polo ben de Tui nen coa implementación do noso programa en mente para estar satisfeitos co sentido do noso voto na investidura nen co panorama actual. Levámolo dicindo desde as eleccións, C21 estaria disposta a falar de alternativas cun centro-dereita no que as persoas que ocuparon postos de responsabilidade nos gobernos entre 1991 e 2015 deixaran paso no concello a outras dos seus mesmos partidos. 

O transporte na Área Metropolitana

Despois da retirada da orde do día no pleno de xullo da proposta do goberno local da integración de Tui no ente administrativo político denominado Área Metropolitana de Vigo, coido que é importante non confundilo coa realidade económica e demográfica do mesmo nome, Enrique Cabaleiro comprometérase a traer de novo en setembro a pleno  a proposta, cando constatamos, ao receber a convocatoria de pleno, que non cumprira a sua promesa, a Executiva Local de C21 decidiu presentar unha moción de urxencia para lograr que un tema de importancia capital para Tui fose debatido con luz e taquígrafos ante a reticencia do alcalde a traelo a debate e votación. 

Neste momento no que todos os concellos da comarca están debatindo e pronunciandose sobre o tema considerábamos importante que o pleno se pronunciase sobre este asunto, é relevante informar que antes do pleno de xullo, convocamos aos tres partidos da oposición; PP, CT e APT para convencelos da insensatez que suporía entrar na AM e naquel momento conseguímolo, de feito o alcalde tomou en xullo a decisión de retirar o punto da orde do día porque en xunta de porta-voces. antes do pleno decatouse de que perdería a votación. 

No pleno de onte, a moción de rexeitamento á entrada na AM recibiu o apoio de C21 e APT, mentres que PP e CT mudaron de opinión e abstiveronse e votaron en contra os catro partidos que integran o goberno. Non podemos evitar lamentarnos de que o BNG, que sempre mantivo a retórica de que había que pechar as deputacións, agora aplauda impertérrito á creación doutra deputación. 

Esta mañá chegaronnos queixas de usuarios do transporte que nos critican con dureza por non querer entrar na AM, co abaratamento do transporte que a eles lles reportaría. O primeiro que compre aclararlles é que C21 ten dous concelleiros e na corporación somos 17, é dicir, C21 ten unha capacidade  de influencia moi limitada sobre as decisións do pleno. 

Con respeito á cuestión do transporte vamos plasmar nunha serie de puntos porqué non consideramos beneficioso o subsidiamento do transporte para ir a Vigo:

1. É un abaratamento artificial, a empresa deixaría de ingresar de forma directa unha cantidade que lle sería ingresada vía subsidios financiados con impostos, é dicir o custo segue sendo o mesmo só que os usuarios deixarían de pagar unha parte que pasarían a pagar os contribuintes, é dicir, os usuarios aforrarían e os contribuintes, incluindo os que son pobres e non collen nunca o autobús pagarían o transporte dos que si apañan o autobus. 
2. Pretender que os contribuintes paguen o transporte dos usuarios é sinxelamente inxusto, claro, é fantástico para o que paga menos pero é inxusto, é unha transferencia de custos aos demais, aos que non collen o autobús, incluindo por exemplo a unha familia humilde de Caldelas, Pexegueiro ou Ribadelouro que paga impostos e taxas e ao que ese autobús non lle presta nengún servizo.
3. Claro que entre as persoas que necesitan o autobús para ir a Vigo hai xente moi apretada económicamente á que un abaratamento do autobús lle suporía un alivio importante, pero iso non xustifica que para aliviar a uns apretemos a outros igualmente necesitados. 
4. Temos que ter clara a relación de gasto público con ingreso público, é dicir con impostos, se todos pedimos máis e máis gasto público podemos estar seguros de que o vamos pagar por outro lado. Non é compatible un programa eleitoral que prometa máis gasto e menos impostos, nas municipais habia varios, o de C21 promete menos impostos e menos gastos. 
5. Non vaia ser o demo que os que agora montan en colera porque C21 non está de acordo en que os contribuintes paguen o autobus aos usuarios se queixen no futuro pola suba de taxas e impostos que eles coadxuvaron coa sua petición de transporte subsidiado. 
6. Neste pais o sistema político contribuiu a crear e consolidar unha idea falsa, a de que hai cousas que son gratis, que non teñen custo, oimos con frecuencia, sanidade gratuita, educación gratuita, etc, etc. Pois ben, é mentira, repetimos, é mentira, a sanidade non é gratis, a educación tampouco, nada é gratis, hai que facer as escolas, os hospitais, pagarlle ao persoal, os medicamentos, o material, etc, repetimos, non é gratis. Outra cousa é como se paga e se a calidade do servizo corresponde ao que pagamos, pero non é gratis, por moito que coincidan PP, PSOE, BNG e Podemos neste punto. 
7. O sistema segue instalado na ocultación dos custos de todo, non estamos sentando os pilares dunha sociedade máis responsable, todo o contrario, estamos incentivando as decisións irresponsables, en C21 estamos de acordo en garantir un aceso universal, a determinados servizos, pero non se debe facer ocultando os custos e impedindo a escolla, como na actualidade. Fixadevos se hai ocultismo que ninguén fala de que a caixa das pensións quebrará nun ano e medio.
8. Os políticos intervencionistas ocultan os custos porque da votos, sempre hai grupos agradecidos de que o político lles page con diñeiro dos demais determinados custos que así se aforran, non se dan conta que unha sociedade que funciona así non vai polo bo camiño. 
9. C21 prefire dicir a verdade ainda que ás veces supoña perda de votos, somos diferentes, a verdade na política non abunda, C21 vai coa verdade por diante, mesmo verdades incómodas e que nos fan crear inimigos en grupos que lles deben favores á política ou que ainda non llos deben pero queren recibilos. Non nos engañemos, a clase política é un reflexo da sociedade, neste pais hai demasiada xente pendente de que os demais lle paguen o que el considera moi necesario pero non quere pagar, pero todo se paga, e todos somos contribuintes e todos acabamos pagando as prebendas que os políticos intervencionistas reparten para gañar votos. 
10. Tamén hai consideracións doutro tipo, un abaratamento artificial do transporte crea un efecto succión cara Vigo, crea un incentivo para coller o autobús con máis frecuencia e ir a Vigo con mais frecuencia; evidente, e non nos interesa drenar actividade cara Vigo.
11. Para estar no servizo de transporte da AM, de entrada hai que financiar o custo da estrutura central da AM, é dicir, a repercusión en impostos é moito maior que o retorno en subsidios para o transporte, de entrada unha suba forte do IBI e despois o demais tendendo á igualación fiscal con Vigo, que ten unha presión fiscal moito maior que Tui. Sí somos culpables, queremos seguir pagando menos impostos que en Vigo e se poden ser menos dos que pagamos agora ainda mellor. 
12. A entrada na AM supón unha perda brutal de autonomia local e unha subordinación total a Vigo en decisións que son estratéxicas para Tui, a Lei da AM está en internet, animamosvos a lela.
13. Dicir a verdade se cadra non da votos, pero os que coas suas reaccións virulentas ante a verdade incentivan a mentira que non se queixen despois de que os políticos son tal e cual.  

Son do governo, estou aqui para te axudar, di o político, mentres rouba a
carteira do contribuinte e lle da unhas moedas